LAOAG CITY – Kinumpirmaran ni Police Senior Inspector Chris Anthony Sorsano, chief of police ti PNP-Solsona a dua a lallaki ti pimmusay bayat ti panaggi-inom da iti paset ti Mt. Sikapo.
Binigbig ni Sorsano ti maysa kadagiti biktima a ni Basilio Bataan, maysa a CAFGU idiay Apayao ken ti maysa pay a saanen a nainaganan ket naitaray iti ospital iday ciudad ti Batac.
Segun iti inisyal nga impormasyon manipud iti PNP, bayat nga aggi-inom dagitoy iti bantay a paset ti Calanasan, Apayao ket aksidente a napagbalin da a chaser ti formalin.
Gapo iti daytoy, kuna ni Sorsano a mabalin a nasabidongan dagiti biktima.
Naamoan a ti formalin ket maipagarop nga us-usaren dagiti agan-anop ti animal tapno ma-preserbar dagiti matiltiliwan da nga ayop.
Kunana a basar ti impormasyon da a nakalap da ket uppat dagiti naggi-inom ken dagiti dua ket addan iti kustudiyar ti Calanasan, Apayao.
Kabayatanna, nagpanawagan ni Sorsano nga agannad kangrunaan na dagiti aggi-inom tapno saan a maulit ti nasao a pasamak.
