LAOAG CITY – Inpakaammo ni Engr. Joselito De Vera, Division Manager ti National Irrigation Administration ditoy probinsia a nagbalin a beneficial kadagiti mannalon ti epekto ti Bagyo Crising.
Segun kenkuana, maibilang a minor damages laeng ti napasaran dagiti mula dagiti mannalon ditoy probinsia.
Inbatadna nga awan ti nagbalin a seryoso a problema dagiti mannalon kalpasan iti iduduprak ti nasao a bagyo.
Nupay kasta, inpasingkedna a nakasagana ti gobierno ken opisinada a mangipaay ti tulong kadagiti mannalon nga ad-adda a naapektaran dagiti mulada.
Innayonna a naiget ti panangmonitorda ti situasion dagiti mula dagiti mannalon tapno insigida a matulungan dagitoy.
Kabayatanna, ibilang met ni Mr. Ferdinand Aquino, maysa a mannalon ken Presidente ti Bonga Pump 3 ti National Irrigation Administration a beneficial ti mapaspasaran a panagtudtudona gapu kadagiti bagyo a dimmuprak ditoy probinsia.
