LAOAG CITY – Inrakurak ni US Secretary of State Marco Rubio ti panangipataw ti Amerika ti sanctions kontra iti presidente ken senior lawyer ti International Criminal Court (ICC).
Ti addang ket paset ti ad-adda a napaigetaan a kampanya ti administrasyon ni President Donald Trump tapno mapukaw ti korte nga ipapaayan ti bileg ti nasurok a 120 a pagilian a miembro iti International Criminal Court, tapno imbestigaren ti war crimes.
Segun ken ni Rubio, pinatawan ti Estados Unidos ti sanction ni International Criminal Court President Tomoko Akane ti Japan ken ni ICC Senior Trial Lawyer Abdoulaye Seye ti Senegal gapu iti pannakiraman da iti ar-aramiden ti korte a mangdusa kadagiti opisyal a ti gobierno na ket saan a pimmabor iti hurisdiksyon ti International Criminal Court.
Kabayatanna, inbatad met ti International Criminal Court nga agtultuloy ti suporta na kadagiti miembro da ken mamati da a ti addang kas ti nagbalin a rakurak ni Rubio ket mangpakapuy iti “rule of law.”
Mainaig iti daytoy, inakusaran ni Rubio ti International Criminal Court kas kurakot ket makapatay a panagpulitika gapu ta ab-abuswen na ti otoridad na, ken limmabesen iti mandato na, rason a saan da a kunsintiren dagitoy nga aramid ti korte.
Naipalaon iti sanctions ti pannakai-freeze ti asset, travel bans, ken restrictions iti serbisyo manipod kadagiti kompanya iti Estados Unidos.
