LAOAG CITY – Nangidasar iti maysa a research proposal dagiti estudyante iti College of Medicine iti Mariano Marcos State University nga agkalikagum a mangpababa iti lebel ti bacteria iti Paoay Lake iti ili ti Paoay.
Daytoy ti inbatad ni Dr. Rickson Balalio ti mangidadaulo iti Provincial Health Office.
Inpakaamo na a ti nasao a research proposal ket inpresentar ni Dr. Peter James Gann iti Provincial Government of Ilocos Norte aglalo kadagiti kameng ti Sang. Panlalawigan ken Provincial Health Office tapno agkiddaw iti suporta aglalo iti pinansiyal.
Ibilang ni Balalio a daytoy ket napintas a panagsukisok gapo ta basar iti naipresentar kadakuada, kalikagum ti nasao a researcher nga agusar kadagiti mula tapno mapababa iti bacteria kas iti pathogen ken ecolli iti danom iti Paoay Lake.
Inbatad na a dagitoy a klase ti bacteria ket naduktalan iti kallabes a nangato iti Paoay lake nga isu met ti rason nu apay a naitantan iti panakaiwayat dagiti water activities iti nasao a lugar gapo ta daytoy ket mabalin a makaipaay ti risgo iti salun-at dagiti tattao.
Innayonna a gapo iti daytoy ket kalikagum ti researcher nga agusar iti water plant tapno mapababa iti nasao a pathogen level ken pumintas ti biodiversity iti Paoay Lake aglalo ket daytoy ket maysa a tourist destination.
Mainaig iti daytoy ket nagkiddaw iti 2 million a pisos a tulong pinansial ti researcher para iti 3 a tawen a panakaiwayat ti panagsukisuk.
