LAOAG CITY – Makapaspasar ita ti panaguyek, panateng ken gurigor dagiti evacuees a naapektaran iti panagbettak ti Bulkan Kanlaon.
Kinuna ni Dr. Razel Nikka Hao, Department of Health – Negros Island Regional director, a gagangay ti kastoy a sakit ita, uray iti ruar dagiti evacuation centers.
Kinunana a makontrol ti sitwasyon kadagiti evacuations centers ngem pinalagipan na dagiti evacuees a pagtalinaeden ti hygiene tapno maliklikan ti nakaro a sakit.
Iti agdama, adda 36 nga evacuees nga addaan iti gurigor ken 16 ti nagkiddaw iti medikal a tulong para iti acute respiratory infection.
Kanayatanna, adda 9,732 a nagtalinaed kadagiti 22 nga evacuation centers idiay La Castellana, Bago City ken La Carlota City iti Negros Occidental ken iti Canlaon City iti Negros Oriental.
