LAOAG CITY – Inbatad ni Vice Mayor Vicentito Lazo ditoy ciudad ti Laoag a nagkedked ni dati a Mayor Chevylle Fariñas a mapan dumatag iti konseho tapno agpalawag mainaig iti mapukpukaw nga 85-milyon a pisos manipod iti pagkabanan ti ciudad.
Inlawlawag ni Lazo a basar iti surat ti dati a mayor, inbaga na a saanen a kasapulan a mapan agpalawag iti konseho gapu ta manarimaan ti pannakatratar ti kaso iti ombudsman.
Inbaga ti bise mayor a saan dan a sinungbatan ti surat ti dati a mayor gapu ta usto met ti nagbalin a takder ni Fariñas.
Maipalagip a ti dati a city treasurer ditoy ciudad a ni Elena Asuncion ti maitudtudo a nangitaray iti nasao a kantidad.
Ti nasao nga isyu ket nagbalin a nabara pagdidinnamagan ditoy ciudad, addan nasurok nga uppat a tawen ti napalabas.
Kalpasan a naibutaktak ti isyu ket kellaat lattan a nagpukaw ni Asuncion no sadinno nga agpapan ita ket saan pay nga ammo ti ayan na.
Naipila met ti reklamo kontra ken ni Asuncion idi Pebrero 23, 2017.
