LAOAG CITY – Positibo ti nagbalin a reaksyon ni dati a senador Antonio Trillanes IV iti panangkumpirmaran ti Anti-Money Laundering Council wenno ALMC dagiti rebelasyon na.
Kalpasan ti panagatendar ni Trillanes iti maiktlo a panagdengngeg ti House Justice Committee iti ‘impeachment’ kontra ken ni Vice President Sara Duterte, indanun na ti panagyaman na iti panangkumpirmar ti Anti-Money Laundering Council dagiti inbagbaga na.
Kuna na a nabang-aran iti panangkumpirmar a mismon ti Anti-Money Laundering Council ti inpublikar na nga impormasyon mainaig kadagiti transaksyon ti pamilya Duterte iti bangko.
Nupay kasta, nakarikna ti ladingit gapu ta 10 a tawen paylaeng ti napalabas sakbay a rimuar ti kinapudno mainaig iti 18 a transaksyon dagiti Duterte iti bangko nga agbalor ti minilyon a kantidad.
Mangnamnama ti dati nga agpanpanday linteg nga agtultuloy ti panagdengngeg iti ‘impeachment’ tapno maikkaten ti maipagarop a panagpampammarang ti pamilya Duterte.
Inpetteng ni Trillanes a ti kwarta ti pamilya Duterte ket maipagarop nga aggapo iti illegal a droga isut gapuna a ti kiddaw na ti publiko ket agriing kadagiti rebelasyon na a kinumpirmaranen ti Anti-Money Laundering Council.
Innayon na a dagiti rebelasyon na ket saan nga imbento wenno inar-aramid na laeng nga istorya.
Kabayatanna, insungbat met ni Vice President Sara Duterte a nadalos ti ‘service record’ na ken kaanuman ket saan a naaddaan ti kaso iti panagusar ti pondo ti umili.
