LAOAG CITY – Agtultuloy ti imbestigasion ti Federal Bureau of Investigation maipapan iti napasamak nga panangdarusdos ti maysa a pick-up truck idiay French Quarter ti New Orleans a nakatayan ti 15 nga indibidual ken 35 ti nasugatan.
Daytoy ti inpakaammo ni Bombo International News Correspondent Rene Ballenas idiay New Jersey, United States of America a kalpasan a maim-imbestigaran nu ti panagatake ket maysa nga act of terrorism.
Kinunana nga awan pay dagiti pakabigbigan dagiti nagbalin a biktima gapu ta mannarimaan pay laeng ti imbestigasion dagiti otoridad.
Basar kadagiti impormasion ti suspek ket agtawen ti 42, taga-Texas ken mabigbig a ni Shamsud Din Jabbar.
Innayonna a saan a ninamnama ti kaaduan a ti napasamak nga insidente nangruna ta selselbraran dagiti kaaduan ti bisperas ti baro a tawen.
Malaksid iti daytoy, kuna ni Ballenas nga agtultuloy met ti imbestigasion dagiti otoridad maipapan iti bimtak a Tesla Cybertruck a napno ti gasolina ken eksplosibo iti sango ti Trump Hotel idiay Las Vegas, Nevada, a nakatayan ti driver ken nasugatan ti pito nga indibidual.
