LAOAG CITY – Nagturong iti delegasyon ti Ilocos Norte idiay Shandong, China babaen iti Provincial Foreign Affairs Office iti nadakamat a lugar.
Segun ken ni Sangguniang Panlalawigan Member Johanson Chua, nagpaut ti grupoda idiay Shandong iti uneg ti uppat nga aldaw.
Kunana a ditoy a naisayangkat ti business match making processes pakairamanan ti pannakitaripnongda kadagiti potential investors.
Inlawlawag ti bokal a babaen iti Invest office ket rinugyanen dagitoy ti nagawis kadagiti investors nga interesado a mangipasdek iti paktoria ken production plants ditoy probinsia.
Malaksid iti daytoy, kinuna ni Chua nga adda dagiti nakasarsarita dagitoy a suppliers nga interesado a makisosyo kadagiti local a negosiante ditoy probinsia para iti mabalin a panagsisinnukat dagitoy ti produkto.
Kagiddan daytoy, inpakaammo ti bokal iti panangdamag kenkuana ni Bise Gobernador Matthew Marcos Manotoc no adda dagiti nakasarita dagitoy nga interesado nga umay agpuunan ditoy probinsia a nupay saan nga adu dagiti investors a nakasarsaritada ket innem kadagitoy ti nangipkita iti panagkalikagumda a mangiyestablisar ti negosio ditoy probinsia.
Kabayatanna, kunana pay a naisursur pay dagitoy iti wholesale market idiay Jinan City, Shandong a maysa kadagiti kadakkelan a wholesale market iti intero a lubong a dandani amin a banag ket magatang ditoy a lugar.
Mangnamnama ni Chua a naan-anay a magutigot dagiti nadakamat nga investor a mangiyestablisar ti negosio dagitoy iti probinsia iti babaen ti Invest office iti probinsia.
