LAOAG CITY – Inlawlawag ni Dr. Samuel Zacate, Director General ti Food and Drug Administration wenno FDA no anya iti plano da pakaseknan iti kinaawan ti presensiya ti maysa a pharmacist kadagiti dadduma a parmasya ditoy pagilyan.
Kunana a nakailanad iti mandato iti Food and Drug Administration nga iti maysa a pharmacy wenno pagtagilakoan iti agas ket kasapulan nga adda iti pharmacist a madutukan.
Mainaig iti daytoy, inbunanag na a dagiti awan ti pharmacist na a paglakoan ti agas ket dagiti maaw-awagan iti “low pharmacy” wenno dagiti botika a saanna a kabaelan ti mangsweldo iti maysa a pharmacist.
Innayon na a ti maysa pay a rason a makitkita na ket ti saan nga agpada a demand ken supply ti pharmacist ditoy pagilyan.
Gapo iti daytoy, inbatad na a nakikoordinar iti Professional Regulation Commission wenno PRC ken iti Technical Education And Skills Development Authority (TESDA) tapno masolusyonan daytoy a problema.
Kunana a babaen iti panagkinnamayet dagiti tallo nga ahensiya ti gobierno ket naan-anay a maipatungpal iti New Pharmacy law.
Inlawlawag na a babaen ti baro a pharmacy law ket mai-activate iti pannakaipaay iti pharmacy assistance kadagiti pharmacist.
Segun kenni Zacate, nu maipama daytoy a kalikagum da ket masolusyonan da iti problema seknan ti kinaawan ti pharmacist kadagiti dadduma a pharmacist ditoy pagilyan gapo ta matulongan da dagiti babassit a botika a saan na kabaelan ti mangpasweldo iti maysa a pharmacist.
Nupay kasta, inpaganetget ti director general a kasapulan iti naan-anay nga oras tapno maipatungpal da daytoy gapo ta maysa a tripartite agreement daytoy iti Food and Drug Administration, Professional Regulation Commission ken iti Technical Education And Skills Development Authority.
Inpetteng na a nakailanad iti timeline da a daytoy ket maileppas iti 3 a bulan.
