LAOAG CITY — Nangipaulog ti Food and Drug Administration (FDA) iti pakdaar kontra iti panaggatang ken panagusar iti saan a nairehistro a cosmetic product a Nisce Skin Basics Anti-Acne Soap.
Segun iti Food and Drug Administration Advisory No. 2024-1062, daytoy a produkto ket saan a nagdalan iti umno a proseso ti pannakaapruba ti ahensia.
Mainaig iti daytoy, mabalin a peggad iti salun-at ti publiko dagiti saan a nairehistro a cosmetics gapu iti kinakurang ti impormasion maipapan iti kinatalged, kalidad, ken kinaepektiboda.
Kabayatanna, ti panangusar iti nadakamat a produkto ket mabalin nga agresulta kadagiti saan a manamnama a reaksion kas iti pannagbudo, panaglabbaga, ken dadduma pay a dakes nga epekto iti kudil.
Nagpalagip ti Food and Drug Administration kadagiti consumers a kitaen a nasayaat dagiti produkto a gatangenda ken siguraduen a nairehistro ken inaprobaran ti ahensia.
