LAOAG CITY – Nangipaulog ti Food and Drug Administration (FDA) iti napateg a pakdaar iti publiko, maipapan iti panaggatang ken panagusar kadagiti saan a nairehistro nga agas.
Iti kaudian nga advisory-da, mamakdaar ti ahensia maipapan kadagiti peggad dagiti sumaganad nga agas nga awan ti rehistrasion manipud iti ahensia:
1. Glutathione Collagen Glow 60 Gummies
2. Extra Strength Glutathione Collagen Glow Anti-Aging Formula 60 Gummies
3. Nature Glow Glutathione Collagen Glow 30 Gummies
Segun iti nasao nga ahensia, napaneknekan babaen ti Post-Marketing Surveillance (PMS), saan a limmasat dagiti nadakamat nga agas iti proseso ti panagrehistro ken saan a naikkan iti maitutop nga autorisasion kas iti Certificate of Product Registration (CPR).
Gapu iti daytoy, saan a masigurado ti ahensia ti kalidad, kinatalged ken kinaepektibona dagiti nadakamat nga agas.
Basar iti ahensia, ti panagusar kadagiti saan a nairehistro nga agas ket mabalin a mangpataud iti nakaro a peggad iti salun-at.
Mabalin a saan a nasubok dagitoy a produkto gapu iti kinatalged, kinaepektibo, ken kalidadda, nga adda posibilidad dagiti dakes nga epekto wenno di ninamnama a reaksion.
Binalakadan ti Food and Drug Administration dagiti amin nga umili nga agbalinda a kritikal iti panaggatangda iti agas ken siguraduenda nga addaanda iti umno a rehistrasion ken pammalubos manipud iti ahensiad.
