LAOAG CITY – Inpetteng ni Vice President Sara Duterte a maipagarop a naibusen ti pondo ti Pilipinas, kagiddan ti panangdakamat na iti maysa a memorandum manipod iti Department of Budget and Management (DBM) a mangibilbilin a bilangen ti a savings dagiti ahensya ti gobyerno.
Iti maysa nga interview idi Mayo 5, inbatad ti Bise Presidente nga awanen ti pondo ti pagilian idi sinungbatan na ti maysa nga overseas Filipino worker (OFW) maipanggep iti sitwasyon ti ekonomiya ti Pilipinas.
Segun ken ni Duterte, nakaawat ti Office of the Vice President (OVP) ti pammilin nga i-account ti savings ti kada opisina tapno maamoan ti nabatbati pay a pondo ti gobierno.
Inpaganetget na ti “triple whammy” ti panagngato ti presyo ti gasolina, panagkapuy ti piso, ken inflation, a kunana ket masapol a masolusyunan tapno maprotehiran dagiti marigrigat.
Kabayatanna, dagus a naglikudan daytoy ti Malacañang, ken inpettengna nga adda dagiti maipatpatungpal a programa a pang-ekonomiya ti gobierno.
Segun ken ni Palace Press Officer Undersecretary Claire Castro, adda dagiti addang ti administrasyon tapno matulungan ti nagduduma a sektor, karaman dagiti OFW.
Dinakamat pay ni Castro a dagus nga inbilin ni Presidente Ferdinand Marcos Jr. idi Pebrero para iti repatriation ken tulong kadagiti OFW iti baet ti tension iti Middle East.
