LAOAG CITY – Arig dumagsen pay ti trabaho dagiti mangisursuro kadagiti pampubliko a pagadalan kalpasan a naammoan a karaman isuda iti panangipatungpal ti Academic Recovery and Accessible Learning wenno ARAL Program ken Summer Remediation Program wenno SRP base iti guidelines nga inyisyu ti Department of Education (DepEd).
Kagiddan iti daytoy, naiget nga inpetteng ni ACT Teachers Party-list Representative Antonio Tinio a maisupadi daytoy iti inkari ti departamento iti budget deliberation iti napalabas a tawen.
Inbatadna nga inlabanda ti P8.96-B a pundo para iti programa tapno maka-hire ti Department of Education kadagiti tutor, makaipaay ti materials ken training ken naurnos a sueldo.
Nupay kasta, kunana no kastoy laeng ti agbalin a sistema ket kasapulan nga ilawlawag ti Department of Education no kasano nga usaren ti nasao a pundo kas ti panagbayad ti patas kadagiti mangisursuro ken tutor pakairamanan ti overload ken overtime a panagtrabahoda.
Maipalagip a nangilatang ti pundo para iti nasao a programa tapno ag-hire ti Department of Education dagiti tutor nga isu ti mangiyimplimentar kadagiti nasao a programa ken masigurado a saan daytoy a baklayen dagiti mangisursuro kadagiti pampubliko a pagadalan ngem arig saan a kayat nga usaren ti departamento ti nasao a pundo.
Gapu iti daytoy, karaman latta dagiti mangisursuro iti pampubliko a pagadalan iti panangasikaso ti nasao a programa mangrugi inton bigat, Mayo 6 agingga inton Hunio 2 kagiddan iti panagsagsaganada iti panangrugi ti Academic Year 2026-2027.
