LAOAG CITY – Awan ti problema iti pannakaaramid ti kaadoan a flood control projects ditoy probinsya malaksid iti proyekto ili ti Vintar.
Daytoy ti inbatad ni Ilocos Norte 1st District Representative Sandro Marcos kalpasan a nasaludsud kenkuana maipanggep dagiti nagbalin a duktal nga ado dagiti flood control projects iti pagilian a saan a nasayaat ti pannakaaramid na.
Maipalagip nga iti maikapat nga State of the Nation Address ti ama na a ni Presidente Ferdinand Marcos Jr. ket binallaagan na dagiti kunniber nga opisyal ken kontratista a nagaramid iti palpak ken am-amangaw a flood control projects ken nagpangta nga agsungbat dagiti nagkurakot iti likudan ti “ghost projects”.
Inlawlawag ni Congressman Marcos a malaksid a daan unayen ti flood control project iti ili ti Vintar a naipasdek paylaeng addan 8-15 a tawenen ti napalabas ket substandard pay ti pannakaaramid na.
Inkari ti diputado a daytoy ti tutukan ken masapol a solbaren da.
