LAOAG CITY – Nagballigi ti naiyuswat a fluvial parade manipod Metro Gabu agingga na iti Metro Lapaz ditoy ciudad ti Laoag.
Daytoy ti nagbalin a komento ni Mayor Michael Marcos-Keon iti panagbitla na kalpasan a naisanglad ti imahe ni St. William the Hermit iti Metro Lapaz.
Nagyaman ti mayor kadagiti nangorganisar iti nasao a parada pakaibilangan da Mrs. Anna Carmela Remigio, tourism officer ditoy ciudad ken chairman ti Committee on Festivals, Sangguniang Panlungsod member Handy Lao, kenni Mr. Jay Marin Domingo iti tourism office ditoy ciudad.
Inbatad na a sinuportaran da ti nasao a programa gapu ta kayat da a marikna dagiti taga Gabu ken Lapaz a saan laeng a dagiti taga sentro ti prioridad ti lokal a gobyerno ditoy ciudad nu di ket uray dagiti coastal areas kas kuma kadagiti nadakamat a barangay.
Mainaig iti daytoy, inbatad ni Konsehal Lao a malaksid Iti panagkalap, kalikagom pay ti lokal a gobyerno ditoy ciudad a padur-asen ti turismo iti lugar isut gapuna nga inaramid da daytoy nga addang.
Innayon ti opisyal a kas chairman ti comitee on agriculture ket kiniddaw na kenni Mrs Marilyn Martin, mangidadaulo ti City Agriculture Office a ti sektor ti agrikultura ket mapag balin kas tourist attraction ditoy ciudad ti Laoag.
