LAOAG CITY – Manamnama a maipangato ti tallo ribu a pisos ti “fuel subsidy” nga ipapaay ti gobierno probinsial kadagiti mannalon ken mangngalap ditoy probinsia.
Daytoy ket kalpasan nga inpakaammo ni Gob. Matthew Marcos Manotoc nga inlungalongna kadagiti maseknan a masapul a saan a nababbaba ngem tallo ribu a pisos ti tulong nga ipaay ti probinsia kadagiti umili.
Imbatadna a nangina ti presio ti krudo ken gasolina ket nasken a maipangato ti budget para iti nasao a programa.
Mainaig iti daytoy, napalaus ti yaman ken ragsak dagiti mannalon iti ili a Badoc ken Pinili a benepisiario ti “fuel subsidy”.
Naammoan a dua gasut innem a pulo dagiti immawat ti sagsangaribu a pisos iti babaen ti nasao a programa.
Mangnamnama dagitoy a maaprobaran iti mabiit ti lungalong ti gobernador tapno ad-adu ti maiyawid dagitoy a gasolina wenno krudo nga usarenda a pagpasayak kadagiti mula dagitoy iti kataltalonan.
