LAOAG CITY – Dinayyeg ti magnitude 7.8 a gingined ti abagatan a paset ti Mindanao itay alas-7:37 ti bigat.
Basar iti Philippine Institute of Volcanology and Seismology, nakita ti sentro ti gingined iti kaadayo a 13 a kilometro abagatan a laud iti General Santos City ken adda ti kauneg a 10 a kilometro.
Nairekord ti kapigsaan a panagdayyeg iti General Santos City nga umabot iti Intensity VII idinto nga Intensity VI ti narikna iti Palimbang ken Senator Ninoy Aquino idiay Sultan Kudarat.
Umabot iti Intensity V iti Davao City, Kidapawan, Carmen (Cotabato) ken sumagmamano nga ili iti Sultan Kudarat ken Zamboanga del Norte.
Narikna ti Intensity IV iti Mati City, Buug, Caraga, Manay ken Tarragona, Intensity III iti Butuan City, Mainit, Dapitan City ken sumagmamano nga ili iti Zamboanga del Sur.
Nakapasar ti Intensity II ti sumagmamano a paset iti Zamboanga del Norte, Zamboanga Sibugay, Leyte ken Southern Leyte.
Iti instrumental readings, nairekord ti Intensity VII iti Koronadal City ken Santa Maria, Davao Occidental; Intensity V iti Davao City; Intensity III iti Abuyog, Leyte ken Intensity II iti San Francisco ken Dulag, Leyte.
Nagballaag ti Philippine Institute of Volcanology and Seismology a mabalin a maaddaan ti aftershocks kadagiti sumarsaruno nga oras wenno aldaw.
Nabalakadan dagiti residente nga agtalinaed nga alerto, liklikan dagiti nadadael a pasdek ken agsagana ti emergency kit para iti kinatalged.
