LAOAG CITY – Adda iti South Korea ti Gilas Pilipinas tapno mangisayangkat ti exhibition games intono Biyernes ken domingo.
Paset daytoy ti panagsagsagana ti national basketball team para iti pannakilaban da iti Asian Games iti Japan.
Karaman kadagiti napili nga agay-ayam para iti Gilas Pilipinas ket isuda Zavier Lucero, Jerrick Ahanmisi, Sedrick Barefield,Don Trollano, Adrian Nocum, Brandon Bates, Robert Bollick, Brandon Ganuelas-Rosser, Justin Arana, Justine Baltazar ken RJ Abarrientos.
Inbatad met ni Gilas coach Tim Cone nga adda ti posibilidad a mairaman ni Justin Brownlee ngem awan pay ti kasiguradwan na.
Saanna met nga inraman ni Jason Perkins iti inisyal a 30-man pool gapu iti sinagaba na nga injury.
Adda iti Group C ti Gilas Pilipinas kadwa na ti pagilian a China, Bahrain ken Kazakhstan iti Asian Games.
Maisayangkat ti umuna nga ay-ayam ti Gilas intono Setyembre 11 kontra iti Bahrain idinto nga intono Setyembre 12 ket makasango da ti Kazakhstan ken iti Setyembre 14 ket makalaban da met ti China.
