LAOAG CITY – Inbatad ti maysa a pediatric cardiologist a mabalin a makapasar ti heart attack dagiti ubbing partikular aglalo no nakaro ti kinangato ti cholesterol wenno problema iti puso sipud kinaubing.
Segun ken ni Dr. Connie Sison ti Philippine Children’s Medical Center, mabalin a maaddaan ti sumagmamano nga ubbing ti natawid da a nangato a cholesterol uray saan da unay a mangmangan ti namanteka a makan.
Mabalin pay nga agbalin a rason ti congenital problems wenn dagiti problema a naala sipud naipasngay a makaapektar kadagiti urat nga agsupsuplay ti dara iti puso.
Nupay kasta, inlawlawag ni Sison a saan a naipagagangay kadagiti ubbing ti klase ti heart attack a masansan a makita kadagiti nataengan.
Kabayatanna, nagtalinaed a kangrunaan a rason ti pannakatay iti Pilipinas ti ischemic heart disease, basar iti Philippine Statistics Authority.
Ti nasao a sakit ket mapaspasamak no makissayan ti suplay ti dara ken oxygen iti heart muscle, a masansan ket gapu iti panagbara ti coronary arteries.
