LAOAG CITY – Inpetteng ni Gov. Marcos nga awan ti makita na nga irregularidad iti pannakagatang dagiti nagduduma ti klase a lugan a para kadagiti agtaltalon iti Ilocos Norte.
Kuna ni Gov.Marcos a nasurot ti umiso a proceso iti pannakagatang dagiti 40 a units ti mini cabs, 5 a units ti bus, ken 70 a units ti mini truck a ti naggapuan ti pundo ket manipud iti excise tax weno RA 7171.
Kuna na a kinaulbod iti naisaguday iti House Resolution No. 882 nga inisponsuran ni Diputado Rudy Fariñas nga agkunkuna nga adda irregularidad iti pannakagatang dagiti nasao a lugan.
Kuna pay ti Gobernador a ti rumbeng a makuwestionaran ket ti gakat ti Diputado ken ti maar-aramid nga imbestigasyon babaen iti Committee on Good Government and Public Accountability.
Kwinestionaran pay ni Marcos ti nasao nga imbestigasyon a nagkunaan na a no agpaypayso nga “in aid of legislation” ti mar-aramid ket masapul ngarud nga agukkon da koma kadagiti ad-ado pay nga inpormasyon keT saan ketdi nga ibagadan nga adda irregularidad iti napasamak a transaksiyon.
Inpetteng pay ti gobernador a dagiti nagatang a lugan ket mausar dagiti agtaltalon nga amulmula iti tabako ket awan ti sinalungasingda a linteg maibasar iti RA 7171.
