LAOAG CITY – Inlawlawag ni Governor Cecilia Araneta-Marcos no apay a maib-ibus ti agas iti Governor Roque B. Ablan Senior Memorial Hospital ditoy ciudad ti Laoag.
Inbatad na a basar iti report ket ngimmato ti consensus ti Outpatients Emergency Department a makasapol ti medical services.
Innayon na a dakkel ti epekto ti Philhealth Yakap a nangpapintas ti primary care package ti nadakamat nga ospital.
Malaksid iti daytoy ket adda pay ti outpatient care benefit iti nasao nga ospital a daytoy ket Philhealth package a masakupan ti emergency medical services para kadagiti pasyente a saan a maadmit.
Nupay kasta, kuna ti gobernador nga ikarkarigatan ti gobierno probinsyal ti aggatang kadagiti agas ken dagiti dadduma pay a supply tapno maipaayan ti napinpintas a serbisyo medikal dagiti umili.
