LAOAG CITY – Kalikagom ni Governor Cecilia Araneta-Marcos ti pannakaestablisar ti command center ditoy probinsya.
Inlawlawag na a ditoy ti pakakitaan dagiti amin a pasamak wenno insidente iti nagduduma a lugar ditoy probinsya.
Inbatad na nga arapaap na a mapagbalin ti Ilocos Norte kas modelo iti kinatibker aniaman dagiti mapasaran a kalamidad wenno didigra ken ti panagbalbaliw ti panawen iti panangidaulo ti Provincial Disaster Risk Reduction and Management and Resiliency Office babaen ti tulong dagiti maseknan nga ahensya ti gobierno.
Kabayatanna, nagyaman ti gobernador kadagiti amin nga ahensya ti gobierno a kanayun a tumultulong iti gobierno probinsyal tunggal adda ti sumangbay a kalamidad wenno didigra ditoy probinsya.
Mainaig iti daytoy, mangnamnama ni Vice Governor Matthew Marcos-Manotoc nga agtultuloy ti panagkikinamayet ken panagtitinnulong dagiti nagduduma nga ahensya ti gobierno ken dagiti Local Government Units tunggal adda ti mapasaran a kalamidad kas ti bagyo, gingined, layos wenno uram ditoy Ilocos Norte.
