LAOAG CITY – Umabot iti nasurok 50 a metro ti kalawa ti nauram a bakante a lote iti Brgy. Natba iti ili ti Bacarra.
Basar iti Bureau of Fire Protection iti nasao nga ili, nagramram ti apoy gapu iti napigsa nga angin iti lugar ken asideg iti baybay.
Maipagarup a nangrugi ti apoy iti basura ken nagwaras kadagiti nagango a ruot ken kayo ti kandaruma.
Kabayatanna, awan met dagiti nadangran iti nasao nga uram ken nairamraman a sanikua.
Agpapan a maisursurat ti damag ket agtultuloy ti imbestigasyon ti BFP nu ania ti pudno a namunganayan ti uram.
