LAOAG CITY – Mangnamnama ti grupo dagiti concerned citizens a baliktaden ti Korte Suprema ti desision iti pannakaideklarar nga unconstitutional wenno maikanniwas iti Konstitusion ti impeachment trial ken ni Vice President Sara Duterte.
Daytoy ket kalpasan a naawat ti grupo a Taumbayan Ayaw sa Magnanakaw at Abusado Network Alliance wenno TAMA NA ti sungbat ti Korte Suprema a nailanad a noted ti suratda a naipatulod.
Segun iti grupo, ita a maibilangen a tinalantan ti Korte Suprema ti kaso ket mangnamnamada a mangiruar ti baro a desision maipanggep iti daytoy.
Basar iti inpatulodda a surat iti Korte Suprema idi Agosto, kiniddawda a mangiwayat ti oral arguments mainaig iti daytoy, baliktaden ti ruling ken ipabus-oy iti Senado nga ituloy ti panangtingiting ken ni Bise Presidente Sara.
Indeklarar ti Korte Suprema nga unconstitutional ti impeachment trial ti Senado gapu iti panaglabsing iti maaw-awagan nga one-year rule bar idi nangipila ti sumurok maysa a complaint iti Kamara.
