LAOAG CITY – Inpetteng ti Hamas a laplappedan ni Israeli Prime Minister Benjamin Netanyahu nga ilunglungalong dagiti mediators a peace deal.
Nakasarita ti Palestinian armed group dagiti mediators a pagilian kas ti Estados Unidos, Egypt ken Qatar no sadinno nakitada a naaddaan ti panagdudua pay ti Israel.
Inlawlawagda a ti baro a proposal ket ad-adda nga umanamong nangruna ken ni Netanyahu isu nga awan ti nasken a rason a pagkedkedan ti nasao a banag.
Naammoan a sumagmamano kadagiti naipalaon iti katulagan ket ti panagsisinnukat dagiti balud ken ti pannakaikkat kadagiti suldado ti Israel iti Gaza.
Mangnamnama ti Hamas a kadagiti sumarsaruno a panagtataripnong dagiti mediators ket maallukoydan ti Israel.
