LAOAG CITY – Kidkiddawen dagiti health experts iti gobierno ti panangkonsiderarda ti panagpabakuna kontra iti dengue.
Daytoy ket kalpasan a naipangato kas epidemic-level ti sakit a dengue kadagiti sumagmamano a paset ti pagilian.
Mainaig iti daytoy, inbatad ni Nina Gloriani, dati a dean ti University of the Philippines Manila College of Public Health, a bayat dagiti programa ti gobierno a dengue prevention measures ket maspol pay ti panangikonsiderar ti gobierno kadagiti bakuna kontra dengue gapu iti agtultuloy a panagngato ti kaso dagiti matmatay iti dengue ken pannakaipangato iti localized outbreaks kadagiti sumagmamano a probinsia.
Ti panagkiddaw dagiti eksperto ket kalpasan ti panangipublikar ti Executive Director Lulu Bravo ti Philippine Foundation for Vaccination ken ni Rontgene Solante, mangidadaulo ti Adult Infectious Diseases and Tropical Medicine Unit iti San Lazaro Hospital a bimmaba ti kaso ti dengue no ikumparar idi napalabas a tawen, ngem agtaltalinaed latta dagiti outbreaks kadagiti sumagmamano a paset ti pagilian.
Kabayatanna, basar iti Department of Health, nakairekorden ti pagilian ti 93,155 dengue cases manipud Enero 4 agingga Agosto 1, no sadinno ket nababbaba daytoy ti 46 a porsiento manipud iti 174,077 a kaso iti kapada met laeng nga aldaw idi naudi a tawen.
Iti baet daytoy, segun kadagiti eksperto, bayat ti panagbaba ti kaso ti dengue, agtaltalinaed latta ti pangta ti nasao a sakit iti publiko.
