LAOAG CITY – Pinilaan ti Provincial Internal Affairs Service (PIAS) iti Police Provincial Office ti reklamo a grave misconduct ti hepe ti PNP-Pasuquin ken dua nga adda iti babaen na.
Dagitoy ket da Police Lt. Ralph Dayag, ti chief of police iti ili ti Pasuquin ken da Police Staff Sergeant Marawi Torda kenni Patrolman Robin Andres.
Daytoy ti kinumpirmaran ni Major Rodolfo Olinda Jr., ti mangidadaulo iti Provincial Internal Affairs Service (PIAS) iti Police Provincial Office.
Inlawlawag ni Olinda a pinilaan da ti reklamo dagiti maseknan gapu iti pannakapaltog ni Reynaldo Rapol kabayatan ti illegal gambling operation nga insayangkat dagiti kameng ti pulisya iti paset ti Barangay Davila iti nasao nga ili.
Iti eksklusibo nga interview ti Bombo Radyo Laoag ken ni Olinda, inbatad na nga isuda a mismo ti nagpila ti reklamo kalpasan a nagbabawi ti pamilya Rapol nga agreklamo.
Inbatad ni Olinda nga inpila da ti reklamo kalpasan nga adda dagiti nakalap da nga ebidensya kas ti inparuk-at a medico legal certificate ni Doctor Frankie Albano.
Nailanad iti medico legal certificate ni Rapol a naiconfine iti Governor Roque Ablan Senior Memorial Hospital (GRASMH) ditoy ciudad ti Laoag a nagsagaba ti biktima ti multiple gunshot wounds.
Inpakaammo ni Olinda a nai-forward dan daytoy a reklamo iti Regional Internal Affairs Service (RIAS).
Maipalagip nga idi kalepleppas ti operasyon ket inpetteng ni Dayag iti interview kenkuana ti Bombo Radyo Laoag a narabaw laeng ti sugat ni Rapol ken mabalin a naisab-it iti natadem a banag laeng kabayatan ti panagtartaray na.
Nupay kasta, nagkedked idi ni Dayag a nanginagan kadagiti kameng ti pulisya a maak-akusaran a nagpaputok ti paltog.
Basar pay ti report, idi Setyembre 3 ket adda ti ited a medico legal certificate ni Doctor Albano iti PIAS a nailanad ditoy a multiple gunshot wounds ti sinagaba ti biktima, ngem ti naiparuk-at idi setyembre 4 nga inpakita ti PNP-Pasuquin ket naikkat ti multiple gunshot wounds.
Agpapan maisursurat daytoy a damag ket saan a naala ti kabibiangan ni Doctor Albano no apay a saan nga agpada ti inparuk-at na a dua a medico legal certificate ni Rapol.
