LAOAG CITY – Kalikagum ti Lebanese group nga Hezbollah a naan-anayen a tumalaw dagiti suldado ti Israel iti pagilianda.
Daytoy ket nailanad iti ceasefire deal ti dua a grupo idi pay Nobiembre.
Ti nasao a katulagan ket indauloan ti Estados Unidos ken France tapno naan-anay a malpas ti sumagmamano a tawenen a riribok.
Naipalaon iti katulagan a nasken nga idi pay Lunes ket nalpasen ti 60 nga aldaw a period a panagtalaw dagiti suldado ti Israel manipud idiay Lebanon pakairamanan ti panagtalaw ti puersa ti Hezbollah.
Inpetteng met ni Israeli government spokesman David Mencer nga adda dagiti addang nga inaramidda subalit ngem inlawlawagna a nasken a dumalan iti naiget a panagadal ken umdas a panawen.
