LAOAG CITY – Padpadaananen dagiti kangrunaan nga stakeholder ti depensa iti intero a lubong ni Presidente Ferdinand Marcos Jr. iti maiyuswat nga historic address iti international audience inton madamdama iti oras ti alas otso ti rabii ita nga aldaw ti Biernes.
Manamnama a manngipaay ti maysa a napateg a mensahe ni Presidente Marcos iti pananglukat ti maika-21 nga edision ti International Institute for Strategic Studies (IISS) Shangri-La Dialogue iti Singapore.
Ni Presidente Marcos ti umuna a Presidente ti Pilipinas a nangipaay ti mensahe para iti kangrunaan a forum ti panangilaban iti Asya.
Ti edision ti IISS Shangri-La Dialogue ita a tawen ket pakipasetan ti sumurok 550 a delegado manipod kadagiti establishimento ti defense and security manipod iti sumurok 40 a pagilian iti intero a lubong.
Inkari ni Marcos ti legal ken geopolitical a takder ti Pilipinas iti West Philippine Sea idinto a dinakamatna ti kinapateg ti nasao a baybay iti world market ken ekonomia.
Inbatadna a ti kangrunaan a panagbitlana iti taripnong ti depensa inton rabii ket nakapatpateg.
Kabayatanna, ti nasao a defense gathering nagtitipon dagiti ministro ti depensa, mangidadaulo ti militar ken nangangato nga opisial ti depensa pakairamanan metten dagiti mangimatmaton ti negosio ken dagiti eksperto iti seguridad manipod iti intero nga Asia-Pacific, Europe, North America ken dadduma pay tapno talantanen dagiti karit iti seguridad.
