LAOAG CITY – Nangiparuk-at ti baro a pagannurotan ti Registry ti International Criminal Court (ICC) para iti naikeddeng a panangusig ken ni dati a Presidente Rodrigo Duterte a sumangsango iti kaso a crimes against humanity mainaig iti kampaniana kontra iti iligal a droga.
Karaman kadagiti rekomendasion ti International Criminal Court Registry ti panangibilin kadagiti partido ken makipaset iti kaso a nalawag a dakamaten dagiti paset ti transcript a kalikagumda nga ipa-redact wenno ilemmeng iti publiko.
Insingasing ti Registry ti panagusar ti transcript verification process nga inusar iti kaso ni Mahamat Said Abdel Kani tapno masigurado ti accuracy dagiti official record ti panangusig.
Malaksid iti daytoy, inallukoy ti Registry ti Trial Chamber III ken dagiti makipaset iti kaso nga usaren ti witness-entity ken evidentiary-materials wenno E-binders modules iti Judicial Workflow Platform.
Segun iti Registry, makatulong daytoy tapno mapagtalinaed nga organisado ken adda iti maymaysa a komprehensibo a sistema ti amin a rekord ti kaso.
Maipalagip nga iti umuna nga status conference idi Mayo 27, inbatad ni Trial Chamber III Presiding Judge Joanna Korner a mangiwayat ti korte ti baro a panangtingiting iti salun-at ti dati a Presidente tapno maammoan no adda ti kabaelanna a sumango iti panangusig kenkuana.
Naikeddeng a mangrugi ti panangusig ni Duterte inton Nobiembre 30.
Maaddaan pay ti dua nga status conferences ti International Criminal Court inton Hunio 23 ken Hulio 14 kas paset ti panagsagsagana para iti umas-asideg a trial.
