LAOAG CITY – Inrakurak ni retired PNP Chief Rodolfo Azurin Jr. a possible a mangirekomendar da kadagiti baro a miembro iti Independent Commission for Infrastructure (ICI) kalpasan a nagikkat ti sumagmamano a kakadwa da idi Disyembre 2025.
Segun ken ni Independent Commission for Infrastructure Special Adviser Azurin, manarimaan ti panangad-adal ti komisyon no kasapulan a sukatan da dagiti nagikkat a miembro.
Maipalagip nga idi Disyembre 2025, inrakurak da dati a Department of Public Works and Highways Secretary Rogelio Singson ken public accountant Rosanna Fajardo ti panagikkat dan iti komisyon.
Inpetteng pay ti opisyal nga awan ti naawat da nga aniaman nga abiso wenno ballaag iti possible a pannakapukaw iti Independent Commission for Infrastructure.
Gapu iti daytoy, itultuloy da ti mandato da nga inpaay ni Presidente Ferdinand “Bongbong” Marcos Jr.
Innayon na a naisumitir dan iti opisina ti Ombudsman ti resulta ti imbestigasyon da mainaig kadagiti maipagarop a maanomalya a flood control projects.
Iyur-uray da laengen ti pinal a desisyon manipod iti opisina ni Ombudsman Jesus Crispin Remulla sakbay nga ikabil da iti Sandiganbayan para iti pannakaipila ti maiyannatop a kaso.
Agtalek met ni Azurin nga adda ti sumagmamano nga indibidwal ken opisyal ti gobyerno ti possible a makasoan kalpasan ti naiget a panangtingiting ken panagimbestigar da kas persons of interest ti Independent Commission for Infrastructure.
