LAOAG CITY – Naduktalan ni National Electrification Administration Administrator Antonio Almeda nga iti agdama ket makapaspasar ti problema iti pinansiyal ti Ilocos Norte Electric Cooperative wenno INEC.
Daytoy iti inbatad ti National Electrification Administration Administrator kabayatan ti panagbisitana ditoy Ilocos Norte.
Kunana a nagturong daytoy ditoy probinsia kas paset pay laeng iti trabaho ken aramiden iti regulatory ken supervisory function-na manipod umabagatan agingga iti umamianan a paset ti rehion uno.
Inrakurakna a babaen iti panangdutokna kenni Atty. Ching Dupayan kas project supervisor, naduktalanna nga adda iti financial linkages wenno problema a pinansiyal ti Ilocos Norte Electric Cooperative.
Mainaig iti daytoy, kuna ni Almeda a ti likudan iti daytoy a pasamak ket gapu iti saan a napintas a panakamanehar iti nasao a kooperatiba.
Innayonna pay a daytoy ti rason no apay kiniddaw ti gobierno probinsial a makibiang ti National Electrification Administration iti Ilocos Norte Electric Cooperative.
Kabayatanna, naragsakan met nga inpakaammo ti National Electrification Administration Administrator a maragsakan iti addang nga inaramid iti gobierno probinsial a pannakitrabaho iti ahensiyada tapno makita iti saan a napintas a mapaspasamak iti Ilocos Norte Electric Cooperative.
