LAOAG CITY – Inpasigurado ni Mr. Gene Reginaldo, ti Education Program Supervisor ken Division Sports Officer ti Department of Education Division of Ilocos Norte a nakasaganan dagiti amin a pakaangayan kadagiti paay-ayam iti pre-qualifying meet iti Palarong Pambansa.
Ti pre-qualifying meet a maisayangkat ditoy probinsya ket pakipartisparan ti Region 1, 2, 3, ken ti Cordillera Administrative Region (CAR).
Segun kenni Reginaldo, maipinal met ita a lawas dagiti playing venue, pasilidad, equipment ken amin a mausar para iti daytoy.
Inlawlawag na nga umabot iti nasurok dua a ribo nga indibidual ti mananama a bisitaen ti probinsya para iti nasao a pre-qualifying meet pakairamanen dagiti atleta ken dagiti opisyal.
Mainaig iti daytoy, kuna ni Reginaldo a no siasinno dagiti karaman iti Top 2 a mangabak iti pre-qualifying meet ket isunto ti makibalubal para iti Palarong Pambansa idiay Marikina City intono Hulyo 29 agingga iti Agosto 5 ita a tawen.
Dinakamat na nga iti dati, dagiti mangabak iti Regional Athletic Meet ket agderetso a makipartisipar iti Palarong Pambansa ngem gapo iti pandemya, kalikagom ti secretariat a makissayan ti karaman iti daytoy rason nga adda ti nabukel nga scheme nga isu ti pre-qualifying meet ken ita ket ti Team Sports ti addaan ti kastoy.
Kabayatanna, inbatad ni Reginaldo a maysa kadagiti karit a sangsangwen da ita ket ti panangisagana kadagiti atleta ti probinsya gapo ta naigeddan iti 4th Periodical Test ken ti panagngudo ti School Year.
Gapo iti daytoy, kunana nga agsanay laengen dagiti atleta no nawaya ti oras dan ken awan dagiti pakakumikoman da iti pagadalan.
Innayon na a ti pakisalipan dagiti atleta ti Ilocos Norte ket ti Baseball Elementary ken Softball Elementary nga irepresentar ti Maglaio Elem. School iti Currimao; ti Football Secondary ken Sepak-Takraw Secondary Boys ket irepresentar ti Burgos Agro-Industrial School; ken ti Sepak Junior Elementary ket manipud met iti Saoit Elem. School iti ili ti Burgos.
