LAOAG CITY – Nakairekord ti Ilocos Region ti agarup 200 milyon a pisos a balor iti pannakadadael iti benneg ti imprastraktura gapu iti habagat ken kadagiti naglabas a bagyo kas ti Bagyo Luis ken Maymay.
Segun ken ni Mr. Freddie Evangelista, Information Officer II, ti Office of Civil Defense – Region 1, basar iti kaudian a datos iti opisinada ket adda ti 60,394 a pamilia wenno 215,074 nga indibidual iti intero a rehion uno ti naapektaran iti iduduprak ti habagat ken dagiti nasao a bagyo.
Inbatadna nga adda ti 65 a lugar ti nalayus no sadinno nga adda ti 687 a pamilia wenno 1,991 nga indibidual ti nagibakwit kadagiti evacuation centers.
Inlawlawagna nga adda ti dua nga indibidual ti naipadamag a pimmusay ngem manarimaan pay laeng ti pannakaberipikarna, dua met ti nairekord a nasugatan idiay probinsia ti Ilocos Sur idinto nga adda ti maysa a mapukpukaw idiay Alaminos, Pangasinan.
Innayonna nga agpada nga adda ti 125 a pagadalan ken opisina ti nangianunsio nga awan ti klase ken serrek iti trabaho gapu iti mapaspasaran a dakes a panawen.
