LAOAG CITY – Rugianen nga idatag iti deliberasion ti House Committee on Justice no adda ti umdas a porma ken substansia ti inpila nga impeachment complaint kontra ken ni Presidente Ferdinand Marcos Jr. ita nga aldaw ti Lunes, Pebrero 2.
Naipila ti impeachment complaint kontra iti Presidente idi Enero 19 babaen ken ni Atty. Andre de Jesus mainaig iti maipagarup a kidnapping ni dati a Presidente Rodrigo Duterte.
Ti maikadua a reklamo ket inpila met ti progressive group leaders ken House members manipud iti Makabayan bloc idi Enero 26.
Nakailanad ditoy ti maipagarup a betrayal of public trust pakairamanan ti maipagarup a panangisingit ti P100 bilyon iti national budget ken kickbacks iti flood control program.
Mainaig iti daytoy, inbatad ni Bicol Saro Partylist Rep. Terry Ridon a ti inaramid ti Executive ket ti panangipatungpal ti tratado iti nagbaetan ti Pilipinas ken ti Interpol.
Inadmitir ni Ridon a marigatan a makalusot iti Kamara de Representantes ti impeachment complaint kontra ken ni Presidente Marcos Jr.
