LAOAG CITY – Insakripisio ti maysa nga ina a ni Mrs. Nonalyn Miguel nga Overseas Filipino Worker idiay Hong Kong ti umadayo para iti pamiliana.
Segun kenkuana, sumurok maysan a dekada daytoyen nga agserserbi kas Overseas Filipino Worker iti nasao a pagilian tapno laeng in-inot a matungpal ti arapaap ti pamiliana.
Inbatadna nga agtawen pay laeng ti tallo ken maysa dagiti dua nga annakna idi nakigasang-gasat daytoy a mapan iti ballasiw taaw.
Inlawlawagna a maysa kadagiti kangrunaan a nasakit a nariknana ket idi nagawid daytoy ditoy pagilian a saanen nga am-ammo dagiti annakna isuna kas maysa nga ina.
Kunana a kas maysa nga ina ket ad-adda pay a kayatna ti umadayo iti ballasiw taaw tapno makita nga agnam-ay ti pamiliana maidasig nga adda isuna iti dennada ngem agrigrigat met ti biagda.
Mainaig iti daytoy, inpakaammona a narigat ti umadayo kadagiti ay-ayaten iti biag nangruna idi nagsakit ti asawana ti Colon Cancer nga addan iti stage 3.
Inpettengna a kalikagumna nga insigida a makaawid ditoy pagilian tapno isuna mismo ti mangtaripato iti asawana ngem gapu iti kinarigat ti panagbiag ket ad-adda a pinilina ti agtalinaed pay laeng tapno adda ti maurnongna a paggatang ti agas ken dagiti kasapulanna ti panagpaimbagna.
Innayonna a rummuar sumrek iti ospital ti asawana gapu iti nakaro a sakit a sagsagabaenna agingga a nagpatinggan ti anges ti asawana.
Kabayatanna, naammoan a nagbalin nga inspirasionna dagiti dua nga annakna tapno ad-adda pay a tumibker ti pakinakemna iti sangoanan dagiti agsasaruno ken nadadagsen a pannubok a simmangbay iti biagna.
