LAOAG CITY – Kinumpirmaran ti Department of Budget and Management (DBM) nga adda ti nailatang a P3.7 billion manipod iti gobierno nga ipaay kadagiti indigent college students tapno suportaran ti kasapulan da tapno maiturpos da ti innala da a kurso.
Segun ken ni Budget Secretary Amenah Pangandaman, nailatang ti nasao a pondo para iti agarop 248 a ribo nga student grantees iti babaen ti Tulong Dunong program a parte ti Universal Access to Quality Tertiary Education – Tertiary Education Subsidy ti Commission on Higher Education (CHED).
Karaman kadagiti estudyate a benepisyaryo ti programa dagiti naka-enroll kadagiti binigbig ti Commission on Higher Education a public ken private higher education institutions tapno adda ti usaren da a pinansiyal iti maikadwa a semester ti academic year 2023-2024 ken umuna a semester ti academic year 2024- 2025.
Inbatad ti sekretaryo a dakkel a tulong ti nasao nga scholarship program para kadagiti estudyante kangrunaan na dagiti agparparikot ti pinansiyal wenno saan da a kabaelan a bayadan ti matrikula iti kolehiyo.
Immunan nga inaprubaran ti sekretaryo ti pannakaiparuk-at ti special allotment release order idi Abril 15 ita a tawen.
Kabayatanna, nangilatang met ti gobierno ti P27.2 billion para iti Free Higher Education program tapno ibaklay ti matrikula ken dadduma pay nga school fees dagiti scholar iti state universities and colleges ken ti Commission on Higher Education-recognized local universities and colleges.
