LAOAG CITY – Manamnama nga agtalinaed a nababbaba ngem P10 a pisos ti rate ti kuryente iti kada kilowatt hour ditoy probinsya.
Daytoy ti inbatad ti Acting General Manager a ni Mr. Perry Martinez iti Ilocos Norte Electric Cooperative (INEC).
Segun ken ni Martinez, ar-aramiden da amin a kabaelan da tapno mapagtalinaed ti nasao a rate kas panagtulnog iti pammilin ti gobierno probinsial para iti pagsayaatan dagiti member-consumers ti kooperatiba.
Kabayatanna, inpakaammo ni Martinez a sagsaganaan da metten ti panawen ti kalgaw nga isu ti kaadoan a panagusar ti kuryente dagiti umili.
Innayon na a nangilatang ti kooperatiba ti pondo a pangsupusop da iti pagkurkurangan ti bayad dagiti member-consumers.
Malaksid iti daytoy, kuna na a kinasarita da metten dagiti power suppliers a tumulong da iti kooperatiba.
Inpasigurado na nga adda ti umdas a supply ti kuryente ditoy probinsya iti panawen ti kaldaw.
