LAOAG CITY – Inyendorso ni Vice Mayor Rey Carlos Fariñas iti Committee on Laws ken Barangay Affairs ti problema dagiti opisyal ti Barangay 48-A, Cabungaan ditoy ciudad ti Laoag.
Daytoy ket kalpasan a naamoan na manipud kenni Acting Chairman Philip Pascual ti problema a dagiti kagawad ti agbaybayad iti 452 a ribo a pisos iti slope protection project a naipatungpal idi 2019.
Segun kenni Fariñas, naipatungpal ti nasao a proyekto ngem naduktalan ti Commission on Audit a blacklisted ti contractor ti nasao nga slope protection project.
Inbatad na a kaasi met dagiti innem a barangay kagawad nga isu ti agbaybayad iti nasao a proyekto no sadinno ket 75 a ribo a pisos ti tunggal maysa rason a saan da a maaw-awat ti honorarium da.
Inlawlawag na a kalikagom na a matulungan dagiti masekan ken masolbar ti nasao a problema.
Mainaig iti daytoy, inbatad ni Barangay Kagawad Jovencio Gaspar iti nadakamat a barangay a nakita da iti dokumento nga inpaima kadakuada ti Commission on Audit a na-disallowance da gapo ta saan a nasurot dagiti kasapulan a papeles iti pannakaimplementar ti proyekto.
Kunana a naamoan da laeng kalpasan ti sumagmamano a bulan sipud simmangpet kadakuada ti nadakamat a papel.
Inpakammo na a sipud 2022 ket nangrugi dan nga agbayad ken iti computation ti Commission on Audit ken iti sumaruno a quarter ket awan ti awaten da nga honorarium.
Inlawlawag na a basar iti palawag kadakuada, no malpas ton ti termino da ket addan to pay ti 42 a ribo a pisos a balanse a nasken a mabayadan ken dagiti sumaruno ti posible nga agbayad.
Masdaaw pay ni Gaspar no apay a saan a karaman ti kapitana gapo ta patien na nga adda met ti responsibilidad iti daytoy.
Innayon na a gapo iti daytoy ket nagkamang da kenni Vice Mayor Farinas.
