LAOAG CITY – Tiniliw dagiti kameng ti Provincial Veterinary Office (PVO), PNP-Laoag ken PNP-Vintar ti innem a tattao iti paset ti Barangay Pila ditoy ciudad ti Laoag.
Daytoy ket kalpasan a ginandat da nga iruwar ditoy probinsya ti 13 a baboy babaen ti panangilugan da iti maysa a truck nga addaan ti plate number a DAT9633.
Segun ken ni Dr. Joselito Ramiro, ti Veterinarian II iti PVO, ti nasao a truck ket aggapo iti ili ti Vintar.
Inlawlawag na a pinagsardeng da ti truck tapno kitaen da no adda ti dokumento da nga agibiyahe kadagiti baboy, ngem awan ti naipakita dagiti maseknan.
Gapu iti daytoy, tiniliw da dagiti nakalugan ti truck karaman dagiti nangbayabay kadakuada a nakalugan ti kotse.
Saan pay a nalawag no pakaikabilan dagiti baboy.
