LAOAG CITY – Nagsaritan dagiti dua nga indibidual kalpasan ti napasamak a panagdinungpar ti maysa nga Innova ken bigbike iti paset ti national highway iti Brgy. 17 iti ili ti Bacarra.
Segun ken ni P/Lt/Cl Roldan Suitos, hepe ti Philippine National Police iti nadakamat nga ili ti nagmaneho ti Toyota Innova ket agtawen ti 45, naasawaan ken residente iti Brgy. 36 iti nadakamat nga ili, idinto a ti nagmaneho ti BMW Bigbike ket agtawen ti 44, naasawaan ken residente iti Santa Teresa Iguig Cagayan.
Basar iti imbestigasion, agpada nga agturturong daytoy iti amianan a direksion iti national highway iti Brgy. 17 iti ili ti Bacarra, idinto a maipagarup a nagsignal ti Innova iti kannawan a direksion ket kellat a nag-overtake ti Bigbike rason a nadungparna ti akin-kannawan a paset ti Innova idinto a naidungpar daytoy iti maysa a street signage ken natnag iti kataltalonan.
Gapu iti daytoy, nagsagaba ti sugat ti driver ti Bigbike iti nagduduma a paset ti bagi na ken dagos a nagresponde dagiti otoridad ken naitaray ti driver ti Bigbike iti Mariano Marcos Memorial Hospital and Medical Center iti ili ti Batac para iti naan-anay a pannakatamingna.
Kabayatanna, saan a nadangran ti pasahero ti Innova a maysa a senior citizen ken naitaray daytoy iti Municipal Health Office iti ili ti Bacarra tapnu dumalan iti physical examination.
