LAOAG CITY – Nanayunan ti Gross International Reserves iti Pilipinas iti nasurok a $3 billion iti nagbaetan ti Enero ken Pebrero ita a tawen.
Daytoy ti inpakaammo ti Bangko Sentral ng Pilipinas.
Ti Gross International Reserves ket reserba ti pagilian a US dollars ken dadduma pay a foreign currencies nga usaren para iti trade ken dadduma pay nga obligasyon, kasta pay a reserba kadagiti napapateg a banag, karaman ditoyen ti balitok.
Inbatad ti Bangko Sentral ng Pilipinas a basar iti preliminary data, ti Gross International Reserves ti pagilian ket ngimmato iti $106.7 billion iti panagngudo ti Pebrero ita a tawen manipod iti $103.3 billion a nairekord idi Enero ita met laeng a tawen.
Kuna ti Bangko Sentral ng Pilipinas a daytoy ket kaibatugan ti 7.5 a bolan a balor dagiti nailako a goods ken bayad iti nagduduma a serbisyo ken kangrunaan a napastrek iti pagilian.
