LAOAG CITY – Mairekreklamo ti sumagmamano nga opisial ti Barangay Davila iti ili ti Pasuquin kalpasan nga ipawilda nga agreklamo ti maysa nga indibidual.
Segun iti agrekreklamo a saanen a nagpabigbig, nagkiddaw ti tulong kadagiti opisial ti barangay kalpasan nga adda ti agririri iti pagtaenganda no sadinno a maipagarup a pinabainan ti abiratna ti nagannakna.
Nupay kasta, inlawlawagna nga imbes a tulungan isuna dagiti opisial ti barangay partikular kada Barangay Kagawad Ralph Marvin Quatchon ken Barangay Health Worker Melda Cariaga ket insungbatda kenkuana a maipagarup a saan unay nga agrekreklamo gapu ta adda ti limitasionna ti agreklamo ken awan ti karebbenganna nga agreklamo gapu ta saan a residente iti lugar nupay napasamak ti panagririri iti nasao a barangay.
Mainaig iti daytoy, inpakaammo ni Barangay Chairman Jesus Agbaog nga awan ti kastoy a pagalagadan nga ipatpatungpalda iti uneg ti barangayda.
Inpettengna nga aniaman a klase ti reklamo a maipadanon iti barangayda ket rumbeng laeng a tratarenda.
Inpasiguradona a kasaritananto dagiti nadakamat nga opisial ti barangay tapno masolbar daytoy a problema iti kabiitan a panawen.
Naammoan a daytoy ti maikadua a daras a nagkiddaw ti tulong ti maseknan nga indibidual kadagiti opisial ti barangay tapno agreklamo.
Kabayatanna, ikarkarigatan ti Bombo Radyo Laoag News Team nga alaen ti takder dagiti mairekreklamo nga opisial ti barangay mainaig iti nasao nga isyu.
