LAOAG CITY – Kinumpirmaran ni Mr. Ismael Ali, ti presidente ti Ilocos Norte United Muslim Association (INUMA) a naiyalud-od iti maysa nga aldaw ti panangrugi ti Ramadan.
Ti Ramadan ket mangrugi kuma ita nga aldaw ngem naitantan agingga intono bigat, Abril 3.
Segun kenni Ali, adda ti aw-awagan da a moon sight ken gapo ta saan a nakita ti bulan idi rabii ket naiyalud-od daytoy.
Inlawlawag na a ti Ramadan ket maibilang a pannubok nga ited kadakuada ti Diyos da a ni Allah ken makita no siasinno ti sinsero nga agaramid ti nasayaat.
Inpetteng na a napateg ken blessing para kadakuada a Muslim ti Ramadan ken daytoy ti aw-awagan da a panangbaliw iti ugali.
Kabayatan ti Ramadan, kuna ni Ali a manipud iti alas-singko ti agsapa agingga iti alas-sais ti malem ket saan da a mabalin a mangipauneg ti anyaman kas makan, danom kasta pay iti agas wenno anyaman a sumrek iti ngiwat.
Innayon na a dagiti obligado nga ag-fasting ket dagiti Muslim nga ada iti husto a tawen, adda iti husto a panagpanpanunot ken nasalun-at.
Naamoan a ti Ramadan ket agpaot agingga iti makabulan ngem no iti panaglippas daytoy ket saan manen a makita ti bulan ket maitantan iti maysa nga aldaw ti panagngudo ti Ramadan.
