LAOAG CITY – Rinugyanen ti Iran ti agibales iti panangbomba ti Amerika kadagiti tallo a nuclear facilities da.
Nangipabanto ti Iran kadagiti short-range ken medium range ballistic missiles iti Al Udeid Air Base iti Qatar.
Sakbay iti panagatake ket inabisoan ti Iran ti gobyerno ti Qatar a rauten da ti military base ti Estados Unidos.
Gagem ti nasao nga addang ket tapno maliklikan ti dakkel a perdisyon iti Qatar.
Mainaig iti daytoy, kinondenar ti Qatar ti irarait ti Iran ken inpetteng na a maysa daytoy a panaglabsing iti soberenya ken airspace da.
Pinasserraan met a dagus ti Qatar ti airspace da, karaman iti United Arab Emirates, Kuwait ken Bahrain kalpasan ti missile strike iti Iran iti Al Udeid Air Base.
Kabayatanna, inrakurak ti maysa a nangato nga opisyal ti US Military a sipud pay idi napalabas a lawas ket inikkat dan dagiti fighter jets ti US iti Al Udeid Air base iti Qatar kas paset ti panangprotehir da iti asset da manipod iti kumarkaro a laban ti Israel ken Iran.
Ti Qatar ket pagtaengan ti kadakkelan nga US military base iti Middle East, ti Al Udeid Air Base, no sadinno nga agarup 8,000 nga US citizens ti agnanaed iti daytoy.
