LAOAG CITY – Bimmara manen ti nagbaetan ti Iran ken Estados Unidos kalpasan ti report a mabalin a maaddaan ti serye ti agsina ken posible a direkta a panagsinnarita iti Pakistan ita a weekend.
Basar iti Iranian state broadcaster IRIB, saan a plano ni Foreign Minister Abbas Araghchi a makipagkinnita a direkta kadagiti United States officials iti Pakistan ngem mabalin nga agserbi a “bridge” ti Islamabad tapno maipadanon ti takder ti Iran mainaig iti posible a panagngudo ti gubat.
Kabayatanna, inbatad ti White House nga inpatulodda da Steve Witkoff ken Jared Kushner iti Pakistan kalpasan a kiniddaw ti Iran ti face-to-face discussions.
Segun iti maysa nga opisial ti Pakistan, maaddaan pay laeng nga umuna ti agsina a panagtataripnong dagiti delegado ti Amerika ken Iran kadagiti opisial ti Pakistan sakbay ti posible a mapasamak a direkta a panagsinnarita inton bigat no agbalin a naurnos ti umuna a rikos ti panagsinnarita.
Nadakamat a simmangpeten iti Pakistan ni Araghchi para iti agsina a panangtalantan ti bilateral issues ti Iran ken Pakistan.
Kagiddan daytoy, nangipatungpal ti United States Treasury ti baro a sanctions kontra iti Iran pakairamanan ti pangnayon ti sumurok-kumurang 40 nga entities ken tankers iti blacklist ken panag-freeze ti $344 million iti cryptocurrency assets.
Inrakurak ni United States Treasury Secretary Scott Bessent, gagem daytoy nga i-target ti “financial lifelines” ti Iranian government kabayatan nga agtultuloy ti tension iti rehion.
