LAOAG CITY – Nagbaliktad ti maysa a jeep a nagluganan ti 17 nga agkakapamilya a residente iti ili ti Solsona iti paset ti Batac-Banna road iti siudad ti Batac.
Kuna ni PLt. Col. Adrian Gayuchan, ti hepe iti Philippine National Police – Batac a basar iti panagimbestigar da, naggapo iti picnic iti ili ti Currimao ti agkakapamilya ken agawid da koma iti ili ti Solsona.
Nu pay kasta, kuna na nga apaman a nakadanon ti jeep iti kurbaan a paset ti kalsada ket kellaat a naawanan ti kontrol iti manibela ti senior citizen a driver rason a nagderderetso iti kataltalonan a namulaan ti tabako ken nagbaliktad.
Gapu iti daytoy, kuna ni Gayuchan nga awan met ti nagsagaba ti nakana a sugat kadagiti pasahero malaksid kadagiti tallo nga indibidual a nagsagaba ti minor injuries.
Naamoan a damo ti dumalyasat ti driver iti nasao a kalsada isut gapu na a saan na a kabisado ti lugar ken saan a napakadaan dagiti kurbaan a paset ti Batac-Banna road.
Kabayatanna, awan iti impluwensya ti nasanger ti driver idi napasamak ti insidente.
Agpapaman a maisursurat ti damag ket awan pay ti nagbalin a komento ti agtagikua ti kataltalonan a nakamulaan dagiti nadadael a tabako.
