LAOAG CITY – Agproblema dagiti residente iti Sitio Natdeg iti Barangay Balatong ditoy ciudad ti Laoag gapo iti saan pay a pannakasemento ti dalan a mapan iti Sanitary Landfill.
Daytoy ket gapo ta bumbaba dagiti darat, batbato, ken pitak manipud iti daytoy ket sumrek kadagiti pagtaengan dagiti residente.
Segun kenni Mrs. Imelda Tabalbag, residente iti nasao a barangay, arig na inoras ti panagikkat da kadagiti batbato iti uneg ti pagtaengan da manipud iti nadakamat a pagdalanan.
Inbatad na nga ado unay ti darat ken batbato a sumrek nangruna no agtudtudo ken no met nainit ti panawen ket natapok met.
Gapo iti daytoy ket kalikagom dagiti residente a masemento iti kabiitan a panawen.
Kabayatanna, kuna pay ni Tabalbag a malaksid iti daga a bumaba ken mapan iti pagtaengan da ket problema da pay ti kaado ti ngilaw.
Inbatad na a patien na a dagiti ngilaw ket aggapo iti sanitary landfill ken mangperdi iti pinnangan da.
Mainaig iti daytoy, inpasigurado ni Ms. Mylene Pascual iti City Environment and Natural Resoruces Office ditoy ciudad ti Laoag a tutukan da tapno tapno dagus a masolusyonan ti kaado ti ngilaw ken ti pannakasemento ti dalan.
