LAOAG CITY – Pinabilib ni Liz Sanya, maysa a kabarbaro a fashion designer manipud idiay Nigeria, ti lubong ti fashion kalpasan a pinartuatna ti maysa a sandal a 4.8 meters (15 feet and 9 inches).
Ti obra a naka-exhibit ita idiay Lagos, Nigeria ket naileppas a mabukel iti uneg ti 72 nga oras. Iti agdama ket naisubmitir dagiti ladawan ken bidyu ti panangaramid daytoy iti Guinness World Records para iti titulo a “Biggest Sandals in the World.”
Ti nasao a proyekto a naiyuswat manipud idi Enero 2 agingga 4 ket gagem a maartapan ti agdama a rekord ti maysa a grupo dagiti artists manipud idiay Mexico.
Ubing pay laeng, napalaosen ti panagayat ni Liz iti panagdisenio ti sapatos ken iti tawenna a 14, aglaklako daytoyen ti bukudna nga aramid.
Inaramidna daytoy a proyekto tapno ipakita ti talento ken ti panagsubli iti naggapoananna, ti Ibadan ken Lagos.
Padpadaanan ita no bigbigen ti higante a sandal ni Liz kas baro a rekord iti pakasaritaan.
